Iraq-a shopping mall kangah mi 60 an thi

Iraq khawchhak lam, Wasit province-a Al-Kut khawpuiah Nilaini zan khan shopping mall hawn thar a kang a, mi 60 an thi. Chin hriat lohin mi 11 an awm bawk.

Kangmei chhuahna hi Hyper Mall a ni a, a kan hma ni nga liam taa hawn chauh niin supermarket leh restaurant te a awm. Building hi chhawng ngaa sang niin a chhawng khatna aṭangin kangmei hi a chhuak a, a chhuah chhan tak erawh hriat a la ni lo.

Wasit province governor Mohammed al-Miyahi chuan kangmei chhuaka thite hi province pumah ni thum sun an ni dawn tih a sawi a, hei bakah building leh mall neitute chu khin an ni dawn tih a sawi bawk.

Iraq ramah hian in sak dan uluk tawk loh avangin kangmei hi a lo chhuak fo tawh. Kum 2021 July thla khan Nasiriya khawpuiah damdawi-in a kang a, mi 60-90 an thi. Kum 2023-ah Kristian tamna, Nineveh province-a Hamdaniya-a wedding hall kang vangin mi 100 chuang an lo thi tawh bawk.