SKorea-ah tuilian leh leimin vangin mi 14 an thi

South Korea-ah ruahsur nasa avanga tuilian leh leiminah mi 14 an thi tawh a, chin hriat lohin mi 12 an awm mek bawk.

Disaster managament office chuan ruahsurin chhiatna a thlena thi zat hi an la pun chhoh a rinawm thu a sawi. Mi 10,000 dawn chuan hmun him lam panin an chenna in an chhuahsan a, in 41,000 vel chuan nimin thleng khan power supply an nei lo bawk.

Ruahsur avanga chhiatna hi chhim lama Chungcheon bialah an tuar nasa ber a, kar liam ta Nilaini aṭanga nimin, Pathianni thleng khan ruahtui 800mm dawn a tla tawh a ni. An ram khawpui Seoul leh hmarlam bialah pawh ruah a sur nasa hle bawk a, chhiatna thleng pawh a awm nual bawk.

Official-te chuan kawngpui 1,920 chu tuilianin a chim a, building leh thlai chinna hmun tam tak a chhe bawk tih an sawi. Ran vulh pawh eng emaw zat an thi a ni.

South Korea hian July thlaa ruah a sur nasat ṭhin avangin an lo inbuatsaih ṭha viau ṭhin. Mahse kumina ruahsur hi kum dang aiin a tam a, record awm tawha darkar khata a sur tam ber ṭumte pawh a thleng niin official weather data chuan a tarlang.