2019-a pawikhawihna thleng kaihhnawihah Sri Lanka police officer ban

Sri Lanka-a police deputy inspector general, Nilantha Jayawardena chu kum 2019 Easter Sunday-a firfiakte pawikhawihna thleng chungchang chhuina kal zelah a hna aṭanga ban a ni ta.

Kum 2019 Easter Sunday-a Kristian biak-in pathum leh luxury hotel ṭhenkhat beih a nih lai khan Jayawardena hi State Intelligence Service (SIS) hotu a ni. Pawikhawihna thlen hnu hian a hna aṭangin chawlh lak tir nghal a ni bawk. He thil thleng chungchangah kum 2024, March 21 khan police commission chuan Jayawardena chu a hnaah inthlahdahah puhin, displinary inquiry a nei a, chhui chian hna hi an zawh hnuah NPC chuan a hna aṭangin a ban ta ni. Police commission chuan Jayawardena chu thubuai siamsak hrang hrangah tiam loh a chantir vek a, pawikhawihna thlenga thi chhungte zangnadawmna pek tur rupee mtd 75 chawi turin a ti bawk.

Easter Sunday-a pawikhawihna thlentute hi Islamist pawl, National Thawheed Jamaat an ni a, ISIS nena inthlunzawm an ni. Biak-in leh hotel an beihnaah hian mi 270 an thi a ni.

Kum 2023 kha Supreme Court chuan he pawikhawihna a thlen laia president Maithripala Sirisena, defence secretary Hamasiri Fernando, national intelligence hotu Sisir Mendis leh SIS hotu Jayawardena te chuan firfiakte chetna a thlen theih thu intelligence aṭanga hriattirna an dawnte ngaihthah a, pawikhawihna thleng tur an dan loh avangin Fundamental Rights an bawhchhia a ni, a lo ti tawh bawk. President Sirisena chu mitthi chhungte hnena pek tur rupee mtd 100 chawi turin a lo ti tawh bawk.