Wuhan khawpuiah Covid-19 hri kai Report aia a let 10 dawna tam an awm

China-a Centre for Disease Control and Prevention-a researcher-ten an zirchianna aṭangin, tunlaia khawvel puma hripui leng mek, Covid-19 hri lo chhuah ṭanna, Wuhan khawpuia hri kai chu official report aia a let 10 dawna tam an ni tih an tarlang. 

Official record-ah chuan hri kai zat hi mi 50,354 nia tarlan a ni. Mahse zirchianna neihah hian hri kai hi mi 5,00,000 dawn an tling nia sawi a ni thung. Wuhan khawpuiah hian mihring maktaduai 11 vel an cheng a, hri kai nia hriat hi he khawpuia cheng zingah 5% dawn an tling pha a ni. 

China hian Covid-19 hri kai official record-ah hian hri kai, mahse taksaa natna langchhuak lo, asymptomatic te a chhiar tel lo a ni.

Covid-19 hri hi Wuhan khawpuia wet market aṭanga rawn chhuak nia hriat a ni a, hri lo chhuah dan leh a darh dante zirchiang turin nakkum January thla hian international scientist team chuan Wuhan hi tlawh an tum.  

Hri lo chhuah dan, a darh dan leh hri kai zat a report danah China sorkar chu langtlang taka thil ti loah puh a ni fo a, hei vang hian China sorkar nena ṭum eng emaw zat inbiakna an neih hnuah zirchiang tura international team kal hi an remti ta a ni.