US-ah Ecuador drug lord 'Fito' thawn

Ecuador gang leader, Adolfo Macias Villamar, 'Fito' tia hriat lar chu ruihhlo leh ralthuam tawlhruk thubuai siamsak a nih chungchanga US court-a inlan turin thawn a ni.

Fito hi kum 2024 January thlaa Ecuador-a Guayaquil tan-in aṭanga a tlanchuah hnuah June thla khan man a ni a, Pathianni khan US-ah hian thawn a ni tih Ecuador prison authority chuan a tarlang. Los Choneros gang hruaitu, Fito hi a thubuai hrang hrangah thiam loh chantirin, Guayaquil tan-inah kum 34 tang tur hian hrem a lo ni tawh a, a thubuai zingah hian ruihhlo tawlhruk leh tualthata puhna pawh a tel. Pathianni zan khan Fito phurtu thlawhtheihna hi New York a thleng a, nimin khan Brooklyn federal court-ah hruai a ni. US Attorney Office chuan kumin April thla khan Fito hi cocaine sem darh, ralthuam leh ruihhlo tawlhruk chungchangah thubuai a siamsak a ni.

Ecuador hi ram muanawm tak a ni ṭhin a, mahse kum rei vak lo aṭang khan Mexico leh Colombia-a ruihhlo tawlh ṭhin pawl nena inzawmna nei, gang inhal tak takten tharum thawhna an thlen fo a ni. Sorkar data aṭanga a lan danin, khawvela cocaine siam chhuah zinga 70% hian Ecuador lawngchawlh hmunte hi an paltlang a ni. Kum 2023 khan ruihhlo ton 294 zet an ramah hian man a ni a, a tam ber chu cocaine an ni.