Bangladesh airforce jet tlain school building a su, mi 27 an thi

Bangladesh airforce training fighter jet, F-7 BGI chu an ram huna Thawhṭanni chawhnu khan chesualin Dhaka-a Uttara biala Milestone School and College building hma a su. Thawhtheihna chetsualna thlenga thi hi mi 27 an tling tawh a, hliam tuar eng emaw zat an awm bawk a, an zinga ṭhenkhat chu an dinhmun a ṭha lo hle. Thi zinga 25 hi naupang, kum 9 - 14 inkar an ni.

Bangladesh sorkar chuan nimin kha ram pumah thlawhtheihna chetsualnaa thite sunna ni atan a puang a, sorkar building leh zirna in hrang hrangah an hnam puanzar chu a ngul chanvea zar a ni. Bangladesh Air Force chuan chetsualna thlen dan chhui chiang turin high-level investigation committee a din nghal bawk. Armed forces thuchhuah chuan pilot hian an thlawh chhuah hnu rei loteah a khawl lamah fel lo a awm tih a hria a, mi tlemna lama thlawh a tum laiin school building hi a su ta niin a tarlang. Pilot pawh hi a thi a ni.

F-7 BGI aircraft hi China-a Chinese Chengdu Corporation siam a ni a, kum 2022 khan Bangladesh hian 36 a lei a ni. School building-a a tlak lai hian class an neih lai tak a ni. A tlak hnu hian a kang zui bawk. School website-a a lan danin Milestones school-ah hian zirlai 6,000 an awm a ni.