US sorkarin Martin Luther King Jr file tlangzarh

President Donald Trump kaihhruai US sorkar chuan Thawhṭanni khan kum 60 dawn liam taa civil rights hruaitu, Martin Luther King Jr. (MLK) thah a nih dan ziahna file, phek 1,000 a chhah document awmna chu a tlangzarh.

MLK thah a nih dan leh an chhuizui danah zawhna tam tak a la awm reng a, document tih chhuahah hian Federal Bureau of Investigation (FBI) in an chhuina, an thil sawi ho hrang hrang te, hma an sawn dan te, James Earl Ray tanpui hlui pakhatin Ray nena an inkawmna a sawi chungchangte pawh a awm niin National Intelligence director Tulsi Gabbard chuan a sawi.

Kumin January thlaa US President atana lak luh a nih hnu lawkah, President Trump chuan president hlui John F Kennedy, a unaupa Robert F. Kenney leh MLK te thah an nih dan chhuina file thuhruk la awmte chu puanzar a lo tiam tawh a ni.Court chuan heng document-te hi kum 1997 aṭang khan mipui hmuha tih chhuah a khap a ni.

Baptist minister MLK hi kum 1968, April 4 khan Memphis-ah kah hlum a ni a, hetih lai hian kum 39 mi a ni. James Earl Ray chuan MLK thattu a ni tih a inpuang a, mahse a hnuah a pha leh thung. American civil rights movement-a mi pawimawh, MLK hi chi inthliarna duh lotu, mitinte intluktlanna atana beitu a ni a, "I Have a Dream" tih hmanga a thusawi chu tun thleng pawhin a la lar a ni.