China-ah coronavirus a leng WHO-in health emergency puan ṭul la ti lo

China rama coronavirus leng chungchanga sawihoa ni hnih chhung meeting an neih hnuah, World Health Organisation (WHO) chief Tedros Adhanom Gheb­re­yesus he hrileng vang hian khawvel pum huapa public health emergency puan chu ṭul an la ti lo tih a sawi. 

Ghebreyesus chuan Ningania meeting zawhah chanchinthar lakhawmtute a kawmnaah, hrileng vang hian China ramah chuan emergency puan ṭul mah se, khawvel pum huap ang chuan health emergency puanna turin a la hlauthawnawm lo nia an ngaih thu a sawi. 

Hetihlai hian China ramah chuan coronavirus hi a la darh belh zel a, nimin khan he hri vei hriatchhuah hi mi 830 an tling leh tawh a ni. He hri leng vanga thi pawh hi an la punbelh zel a, nimin thleng khan thi hi mi 26 an tling tawh. 

Hri leng thar an hmuh­chhuahna, Wuhan City chu khar niin, hrileng darh zel tur venna kawng khat atan mipuite chu Wuhan city tlawh lo tur leh, he khawpuia chengte pawh phalna bik nei lo chuan khua chhuahsan lo turin hriattir an ni tawh bawk. Lunar New Year lawmna tura event buatsaih hrang hrangte pawh ṭhulh niin, punkhawmna hmun hrang hrangte pawh khar a ni bawk. Wuhan City-ah hian hri kai hi hmuh belh zel an la ni a, hei vang hian khum 1,000 awmna hospital pawh sak nghal mek a ni. 

Wuhan City bakah China ram khawpui dangah pawh Lunar New Year lawmna tur event buatsaih eng emaw zat chu ṭhulh a ni a, heng zingah hian Beijing-a event lian tham tak tak buatsaih an tumte pawh a tel a ni.