Khawvel pumah Covid-19 kai Mi mtd 3 chuang tawh

Khawvel pumah Covid-19 kai chu nimin thleng khan mi maktaduai thum an chuang tawh. 

United States-ah hian hri kai hi mi 1,010,507 an awm tawh a, a ram ang zawnga hri kai tam ber a ni a, he hri vanga thi pawh mi 56,803 awm tawhin, Covid-19 vanga thi tamna ber ram a ni bawk. Kar liam ta khan US-ah hian hri kai thar hi nitin mi 30,000 awm ziah ang a ni.   

Thla li chhungin Covid-19 kai hi mi mtd 3 chuang an awm hman a, thla li chhung vek hian he hri vanga thi hi mi 211,766 an awm tawh bawk. World Health Organisation chuan khawvel pumah kum tin hri dang leng vangin mi maktaduai 3-5 vel an thi ṭhin niin a sawi. 

Kar liam ta khan hri kai thar hi nitin mi 82,000 vel an awm anga chhut a ni a, hri kai zawng zawng hmun thuma ṭhena hmun khat chu US-ah a ni a, 43% hi Europe ram aṭangin a ni bawk.  Europe-ah hian Italy, France leh Spain-te chu hri kai tamna ram a ni a, hri kai thar zat hi tlahniam ṭan tawh mah se, kar liam ta khan heng ram pathuma hri kai thar hi chawhrualin nitin mi 2,000-5,000 an la tling pha tho a ni. May 4 aṭangin Italy-ah hian factory-te chu hawn ṭan tum a ni a, Pathianni aṭang khan Spain-ah pawh lockdown chu thlahdul ṭan a ni bawk. 

Covid-19 kai zinga 7% chu Asia ram aṭangin a ni a, Asia rama hri kai tamna ber chu Turkey a ni a, a dawtah hian Iran, China leh India chu a awm a ni. Heng ram palia hri kai zat hi mi 3,16,020 an ni. South Amercia-ah hian Brazil chu hri kai tamna ber niin, hri kai hi mi 67,446 an tling tawh. Africa-ah hian South Africa-ah hri kai hi an tam ber a, mi 4,793-in an kai tawh bawk a ni. 

March thla aṭang khan ram hrang hrangte chuan he hri leng vang hian inkharkhip an puang hlawm a, hei hian hri kai punna hi a tihziaawm phah a ni. 

He hri vanga thi hmasa ber chu China-a Wuhan khuaa mi niin, January 10 khan a thi tih China media-te chuan an tarlang a, hemi ni vek hian Wuhan-ah hian hri kai thar hi mi 41 an awm.