White House-ah Obama leh Trump inkawm

US President Barack Obama leh President-elect Donald Trump chu Ningani khan White House-ah an inkawm a, darkar khat chuang zet hun an hmang.

President thlan dawna an campaign laiin Obama leh Trump-te hi
ṭawngkamin an inbei na hle a, Trump chuan thlan tlin a nih chuan Obama-a policy lo kalpui tawhte a ṭhiah vek tur thu leh, US ram pawna piang a nih thu te, US President neih tawh zinga ṭha lo ber a nih thute a sawi. Obama pawhin Trump chu kawng hrang hrangah President ni tura tlinna nei lo niin a sawi ve bawk.

Mahse US President thar tura Donald Trump thlan tlin a nih hnuah, Obama hian lawmpuina hlanin, ram mipuite pawh lung≠rual taka Trump-a thlawp turin a ngen a ni.

Obama chuan January thlaa President thar hnena thuneihna hlan chhawn tur chu, tluang taka neih a nih theihna tura hmalak chu a ngaih pawimawh hmasak a nih thu a sawi. Trump nen chuan domestic leh foreign policy hrang hrangte sawidunin, Trump-aín US tana Obama team thawhpui a duh thu a sawite chuan a tilawm hle tih a sawi.

Donald Trump pawhin President Obama nena inkawmna hun ṭha leh hlawk tak an nei chu lawmawm a tih thu sawiin, thawhhona ṭha tak an neih zel a beisei thu a sawi bawk. Trump hi a nupui, Melanie-iín a ṭawiawm a ni.

President Obama an hmuh hnu hian, Donald Trump leh Vice President-elect Mike Pence te chuan Republican House Speaker Paul Ryan an hmu bawk a ni.