Khawvel Lawrkhawm
Duterte-a’n defence pact zawm zel tum
Philippines President Rodrigo Duterte chuan an ram ṭhianṭha, US nena defence lama thawhdunna tura inremna an lo siam tawh chu a zah a, zawm zel a tum thu a sawi. Hetih rual hian an ram a, ramdang sipai awmte chu a President term a tawp huna chhuak tura a duh thu a sawi tel.
Duterte hian kum 2014-a US leh Philippines-teín inremna an lo siam tawh, Enhanced Defence Cooperation Agreement (EDCA) chu ṭhiah a duh thu a lo sawi fo tawh a ni. He inremna hnuaiah hian US sipaite chu Philipines rama an hmunpuiah awmkual tura phalna pek an ni.
Malaysia ram aṭanga a haw hnua chanchin thar lakhawmtute a kawmnaah, Duterte chuan hemi chungchang hi a sawichhuak a, ìṬhian leh thawkdun kan ni a, min suihzawmtu sipai te thawhdunna tura inremna pawh kan nei a niî a ti. US nena an thawhdunna chu vawngnung zelin, inremna hrang hrang an lo siam tawhte chu an kengkawh zel dawn tih a sawi.
Taliban-te’n German consulate an bei
Afghanistan hmarlam, Mazar-i-Sharif khuaa German consulate chu Taliban truck bomb hmanga beih a ni a, mi pahnih an thi a, mi 100 chuangin hliam an tuar.
Taliban chuan German consulate beitu an nih thu leh, he thil hi US-in tun thla tir lama Kunduz province-a beihpui a thlakna a, civil mi 32 thihna thleng vanga phuba an lakna niin a sawi.
Bomb phurtu Truck hian German consulate bang hi suin a puak a, bomb puak hian consulate bul hnaia inte pawh a tichhe tel a ni. Bomb puak vanga hliam tuar zingah hian naupang pawh 10 chuang an tel a ni.
Kabul-a German official-te chuan pawikahwihna thleng hi an dem thu an sawi a, Germany Foreign Minister Frank-Walter Steinmeier chuan he thil thleng vang hian Berlin-ah crisis meeting a ko nghal bawk.
Mexico atanga US-a lutru an pung
US official-te chuan October thla chhung khan Mexico aṭanga US-a lut ru chu 16% chuang zetin an pung tih an sawi.
US department of homeland security chuan October thla chhung khan dan loa an rama lut ru mi 46,195 an man a, September thla khan mi 39,501 leh August thlaah mi 37,048 an man bawk niin a tarlang.
Immigration official-te chuan lut ru tam zawk chu Central America aṭang kal, US-a hna ṭha zawk beisei a, Mexico kaltlanga lut an nih thu an sawi a, retheih luat vanga dinhmun ṭha beiseia kal pawh eng emaw zat an tel bawk tih an sawi.