Khawvel Lawrkhawm
Afghanistan-a US embassy khar a ni
Afghanistan rama German Consulate leh American military base a nih avangin venthawn thilah US embassy chu khar a ni.
Kar kalta Inrinni khan firfiakten Afghanistan khawpui, Kabul bula Bagram Airfield-ah bomb tipuakin America mi pali, sipai pahnih leh contractor pahnih an thi. Mi dang 14 in hliam an tuar bawk. Bagram Airport hi US sipaite awma aṭanga mel 30 vela hlaa awm a ni. Hemi hma ni hnihah hmarlama Mazar-i-Sharif khuaa German Consulate chu firfiakten an lo bei tawh bawk a, mi paruk thatin mi 100 chuangin hliam an tuar a ni.
Paris beihnaa thi te hriatrengna hun hmang
Firfiakten kum 2015, November 15-a France khawpui, Paris-a hmun hrang hrang an beihnaa thi mi 130-te hriatrengna chu nimin khan France ramah neih a ni.
President Francois Hollande chuan nimin khan firfiakten an beih, Paris khawpui chhunga hmun pasarih a tlawh a, Notre Dame Cathedral-ah hriatrengna inkhawm buatsaih a ni. Zirtawpni zan khan Bataclan concert hall-ah concert buatsaih a ni bawk. Kum khata liam taah khan Paris khawpuia national stadium, bar leh restaurant panga leh Bataclan concert hall chu beih a ni a, Islamic State (IS) firfiak pawl chuan he pawikhawihna thleng hi an tih niin an chhal. Pawikhawihna thleng vang hian mi 130 an thih bakah mi tam takin hliam an tuar a, sorkar chuan mi 600 chuang zet chu psychological treatment pek chhunzawm an la ni tih a sawi.
Pakistan-a bomb puakah mi 42 thi
Pakistan-a Balochistan province-ah kar kalta Inrinni khan Sufi ho sakhaw hmun pawimawhah thihchilh bomb a puak a, mi 43 an thi.
Bomb puahna hmun hi Lasbela district-a Hub bialah a ni a, Dargah Shah Noorani hriatrenga hmuna Sufi dance dhamaal an neih laiin a puak a ni. Bomb puak vanga thi zingah hian hmeichhia leh naupang eng emaw zat an tel. President Mamnoon Hussain leh Prime Minister Nawaz Sharif-te chuan pawikhawihna thleng hi an dem thu an sawi. Islamic State (IS) chuan bomb tipuaktu niin an inchhal a, IS hian Balochistan province-ah hian kumin chhungin ṭum thum pawikhawihna an thlen tawh a ni.