Hillary Clinton-in A tlin loh chhanah FBI director a puh

US President inthlanna neih zawh taka tling zo ta lo, Democratic Party candidate Hillary Clinton-i chuan a tlin loh chhanah FBI director a puh.

Hillary Clinton-i chuan President thlanga vote thlak dawn hnaih tawhah, FBI chuan US Secretary of State a nih laia a private email a hman chungchang an thar thawh leh vang a ni, a ti. FBI director James Comey-an Congress hnenah October 28 khan lehkha thawnin, FBI chuan Clinton-i private server aṭanga thawn nia hriat email an hmuhchhuah belh thu leh, chhui chian a nih tur thu a hrilh a ni. Clinton-i chuan Comey-an email chungchang a tharthawh leh hma chuan campaign-naah pawh hma a hruai reng niin a sawi.

President candidate pahnih, Donald Trump leh Hillary Clinton ten presidential debate vawi thum an neih zawh hnuah, FBI chuan Clinton-i email chungchang hi a sawichhuak leh a ni. Clinton-i chuan Comey-an a lehkhathawn a tlangzarh hma chuan state tin deuh thawah hma a hruai a, Republican chakna Arizon-ah chauh Trump nen chuan an inhnehtawk tih a sawi.

Comey hian vote thlak hma Pathianni-ah khan Congress hnenah Clinton-i email thawn chungchang an chhuinaah, thubuai siamsakna tur khawp thil an hmuh loh thu a hrilh. Mahse hei hian Trump-a thlawptute a tiphur zawk a, amah beihna remchangah an hmang niin Clinton-i chuan donor-te a hrilh. Comey-an thuchhuah a siam leh, a hnua Clinton-i thubuai siamsakna tur a awm lo tih a puanchhuah inkar hi ni kua a ni a, hemi chhung hian mi maktaduai 24 dawnin vote an thlak hman.

Clinton-in chuan inthlana a chak loh a pawm thu a sawi a, hemi rual hian a chak lohna chhan nia a ngaih ṭhenkhat chu donor-te hmaah a hrilh a ni.