Trump-a’n pem lut maktaduai 3 thawn kir a tum President hlawh atan USD 1 chauh a la dawn

US President-elect Donald Trump chuan thuneihna a chan veleh an rama dan loa pem lut, mi maktaduai thumte chu an rama thawn kir emaw, jail-a tantir emaw an ni dawn tih a sawi.

President atana thlan tlin anih hnua television interview a neih hmasak berah Trump chuan he thu hi a sawi a, inthlan hmaa President Barack Obama signature health reform ṭhiah vek a tum thu a sawi chu, a ngaihtuah
ṭha leh mai thei tih a sawi a, hetih lai hian dan loa an rama pem lutte dapchhuah a tum chu a taka kalpui a tum thu a sawi.

Pathianni-a CBS-in a kawmnaah, Trump chuan pawikhawihtu, criminal record nei te, gang member, ruihhlo-a sumdawng-te an dap chhuak dawn a, heng mite hi maktaduai thum an tlin hial a rinamw niin a sawi.

Trump chuan a hmaa a lo tiam tawh ang ngeiin Mexico ram aṭanga dan loa an rama lutte danna turin, US-Mexico ramriah daidanna bang a siam dawn a, mahse hmun ṭhenkhatah chuan ramri hungna atan hian bang aiah pal siam a ni ang, a ti.

Mi hausa tawntaw, Donald Trump chuan US President atana lakluh a nih hnuah President hlawh, kum khata dollar 400,000 chu lak a tum lo tih a sawi. Mahse dan ang thlapa hlawh a lak ve a ngaih dawn avangin President hlawh atan kum khatah dollar khat a lak tur thu a sawi a, chawlh lian tham pawh lak a tum loh thu a sawilang bawk.

Hnathawh tur tam tak a awm tih sawiin, ramchhunga chhiah lak ṭhin tihhniam a ni dawn a, health care chungchang pawh buaipui nghal a ni dawn tih Trump chuan a sawi. ìHnathawh tur a tam dawn em avangin chawlh pawh kan nei mumal thei dawn lo a ni. Mipuite tan heng hna thawh fel thuai hi kan duh dawn a niî, a ti.

Donald Trum hian Republican National Committee (RNC) chairman Reince Priebus chu a chief of staff atan a ruat niin Pathianni-a official thuchhuah chuan a tarlang. Trump-a campaign manager Stephen Bannon chu chief strategist leh senior counselor atan ruat a ni bawk.