Colombia sorkar leh FARC helten inremna ziak ṭha leh

Colombia sorkar leh FARC helten inremna an ziah chu ram mipuiten an hnawl avangin an inremna thuthlung chu siamṭhat leh a ni a, kar kalta Inrinni khan he inremna hi an ziak fel leh a ni.

Cuba khawpui, Havana-a inremna an siamṭhat hi Cuba Foreign Affairs Buron Rodriguez Parilla enpuina hnuaiah an ziak leh a ni. Inremna thuthlungah hian FARC commander Ivan Marquez leh Colombia sorkar aiawh Humberto de la Calle-teín an hming an ziak.

Humberto de la Calle chuan inremna an ziah thar lehah chuan an ziah hmasaka sawiselna hrang hranga awmte chu siamṭhat a nih thu a sawi a, mi zawng zawng duhdan vekin siam theih ni lo mah se, inremna an siam leh tak chu Colombia mipui tam zawkin an pawm theih tawh ngei a beisei thu a sawi. FARC ho hi kum 50 chuang zet sorkar lakah an hel tawh a, tunah hian member 7,000 vel an la nei mek niin an insawi.