Myanmar-a inbeihna thlengah mi 28 thi

Myanmar khawthlang lam, Rakhine state-a buaina chhuak tharah mi 28 an thi.

Myanmar sipaite chuan Pathianni khan thuchhuah siamin, Dar Gyi Zar khaw bulah mi 22 chuan an hmanraw ken nen sipaite an bei a, heng mite hi sipaite chuan an lo kaphlum niin a sawi. Pathianni vek han state chhung hmun dangah mi dang paruk chu buaina chhuakah tihhlum an ni bawk.

Rakhine hmarlam hi Bangladesh nen a inri-a, he bialah hian Muslim Rohingya te an cheng a ni. Mahse thla hmasa khan border post beih vanga police pakua an thih hnuah, sipaite chuan pawikhawihna thlenga inhnamhnawihte dapchhuah hna an thawk a, mi eng emaw zat thatin an man tawh a ni.

New York-a hmunpui nei, Human Rights Watch chuan Rakhine bialah hian mihring dikna chanvo nasa taka palzut nia sawiin, United Nations hnenah October 22-November 10 inkara Maungdaw district-a in 430 zet tihchhiatsak an nih dante chhui chiang turin a ngen.