Khawvel Lawrkhawm

New Zealand-ah magnitude 7.5-a nain lir a nghing

New Zealand-a South Island-ah Pathianni zan khan magnitude 7.5-a nain lir a nghing a, nimin zing khan magnitude 6.3-a nain a nghing nawn leh.

Lirnghing vang hian mi pahnih an thi a, in eng emaw zat chhiain hmun tam takah lei a min bawk. Hmun tam takah power supply leh tui supply an nei lo a ni. Prime Minister John Key chuan lirnghing hnuah hmun
ṭhenkhat biakpawh theih an ni lo a, report kimchang a luh hnuah chuan thi zat pawh hi an la punchhoh a rin thu a sawi a, Civil defence minister Gerry Brownlee chuan lirnghing vanga infrastructure chhia chu an buaina ber tur nia a lan thu a sawi.

Iraq sipaiten Nimrud khua an la let

Iraq sipaite chuan Pathianni khan Islamic State (IS) firfiakte kut aṭangin Nimrud khua leh a chhehvel bial an la let.

Nimrud khua hi kum 3,000 zeta upa a ni tawh a, Middle East-a hmanlai hmun pawimawh tak pakhat a ni. Mahse kum hnih kaltaa IS firfiakten Iraq sipaite kut aṭanga an lak hnu khan, khawpui leh a chhunga hmanlai thil pawimawh awmte an tichhe nasa a, thil hlu tak tak awmte chu an ru chhuak bawk. Firfiakten an tihchhiat zingah hian BC 9 hunlaia Assyria lal, Ashurnasirpal II lal-in luhna bula milim dah, lamassu tih pawh a tel. A hnuah pawh hmanlai in pawimawh tak tak la ding eng emaw zat chu an bomb chhe leh bawk.

Trump duhloin nawrh huaihawt chhunzawm

US President atana Donald Trump thlan tlin a nih hnuah, an ramchhung khawpui hrang hrangah Hillary Clinton-i thlawptuten Trump duh lohna lantira nawrh an huaihawt chu chhunzawm zel a ni.

Clinton-i thlawptute hian Los Angeles, New York leh Chicago bakah Worcester, Massachusetts leh Iowa City-ahte lungawi lohna an lantir a, hmun tam zawka nawr huaihawtnaah thil duhawm lo thleng a awm lo a, Indianpolis-ah nawrh huaihawtten police-te chu lunga tawngin police officer pahnihin hliam na vak lo an tuar. Nawrh huaihawtte chuan Trump chu president atana an pawm theih loh thu an sawi.