Thailand-in F-16 fighter jet-in Cambodia sipai hmun bei

Thailand leh Cambodia sipaite chu nimin khan ramria ram inchuhin an inbei a, Cambodia sipaiten rocket leh artillery hmanga Thailand thingtlang khua an beihnaah civil mi pahnih an thi. Thailand chuan F-16 fighter jet hmangin ramri hrula Cambodia sipai hmun an bomb ve bawk.

Ram pahnihte hi buaina chawk chhuak hmasaah an inpuh tawn ve ve. Thailand sipaite chuan Cambodia sipaite hian rocket hmangin Thailand thingtlang khaw pakhat chu an rawn kap hmasa a, F-16 fighter jet hmang hian an chhang let tih an sawi. Mahse, Cambodia Ministry of National Defence chuan Thailand sipaiten an bei hmasa a, invenna atan a lo bei let niin an sawi ve thung.

Sipaite hi nimin zing khan an ram inchuh Ta Moan Thom temple awmna bulah an inkap a ni. Inbeihna thlen hnuah Thailand chuan Cambodia ramri a khar nghal vek a, ramri bula thingtlang khaw 86-a cheng mi 40,000 chu hmun him lamah an sawn chhuak nghal bawk. Ram dangte pawhin Thailand-Cambodia ramri hnaihah kal lo turin an mi leh sate an chah nghal a ni.