France-in Palestinian state a pawm dawn

France president Emmanuel Macron chuan September thlaa UN General Assembly neih hunah, France chuan official-in Palestinian state a pawm thu a puang dawn tih a sawi. G7 ram zingah Palestinian ram pawm hmasa ber an ni ang.

President Macron chuan X-ah he thu hi sawiin, Gaza-a indona tih tawp thuai a, civil mite chhanchhuah an ṭul thu a sawi. Inkahhai puan a, mi hren mekte chhuah zalen vek a, Gaza mipuite chhawmdawlna tur tam tham tak pek an ngai a ni, a ti.

Palestinian official-te chuan Marcon thutlukna siam chu lawmawm an tih thu an sawi a, Hamas chuan France hian thil dik tak a ti a ni tiin ram dangte pawh France hi entawn turin an ti.

Israel prime minister Benjamin Netanyahu erawh chuan October 7-a pawikhawihna rapthlak a thlen hnua Palestinian ram pawm tura France President thutlukna siam na taka an dem thu a sawi. 'Palestinian hian Israel kianga din an tum a ni lo a, Israel aia awm an tum zawk a ni," a ti. US pawhin Marcon thusawi hi an pawm loh thu sawiin, secretary of state Marco Rubio chuan nghawng ṭha lo tak nei tur, thutlukna hlauhawm tak a ni, tiin a sawi.

Palestinian state hi UN member 193 zinga 140 chuangin an pawm tawh a, an zingah hian Europe ram ṭhenkhat an tel. Mahse G7 ram zingah pawm an la awm lo thung a, US leh a thawhpui hnai ramte chuan Palestinian state hi an pawm lo.