Israel-in Gaza hmun pathuma beihpui thlak chawlh hun siam

Israel sipaite chuan Gaza Strip-a mihring chen tamna hmun pathumah beihpui an thlakna chu ni khatah darkar 10 zel an chawl ṭhin dawn tih sawiin, mipuite chhawmdawlna tur thawn luh a nih theihna turin kawng an hawng dawn a ni.

Sipaiten beihpui an thlakna an chawlh ṭhinna tur hi Gaza City, Deir al-Balah leh Muwasi ah a ni a, hriattirna dang tih chhuah a nih leh hma chu chawhma dar 10 aṭanga zan dar 8 thleng inbeihna hi an ti tawp dawn tih an sawi. He ruahmanna thar hi nimin aṭang khan an hmang ṭan.

Hun rei tak Gaza Strip-a Israel-Hamas inbeihna thleng tawh avang leh, Israel-in Gaza luhka hrang hrang a dan avangin mipuiten ei leh in tur an tlachham nasa tawh a, hei vang hian chhawmdawlna tam zawk thawn luh phalsak turin Israel hi ram hrang hrangin an nawr reng a ni. Israel leh US thlawp chhawmdawltu pawlin mipuite hi ei turte sem mah se an mamawh a phuhru pha loh le. May thla aṭanga khuahkhirhna a thlah dul ṭhen hnuah Gaza-ah hian UN leh aid group dang truck 4,500 vel an lut tawh a, ni khatah truck 69 vel lut ang an ni. Mahse UN chuan Gaza mipuite mamawh phuhru tur chuan ni khatah truck 500 hmanga thawn luh a ngai niin a sawi.

Israel chuan khawpui pathumah indo chawlh hun siam mah se, Gaza hmun danga Hamas te hmun chu an beih chhunzawm zel tur thu a sawi a ni.

Egypt aṭangin Gaza-ah truck an lut ṭan

Israel sipaiten Gaza hmun pathuma indo chawlh hun an siam tak hnuah, Egypt aṭangin chhawmdawlna phurtu truck-te chuan Gaza panin an tlan chhuak nghal.

Indo chawlh hun an siam chhunga chhawmdawlna phurtu motor-te luhna kawng hi Israel chuan a siam tih sawiin, hei hi UN convoy te an him theihna tura tih a nih thu a sawi. Egypt aṭangin truck eng emaw zat chuan Gaza chhim lama Karam Abu Salem (Kerem Shalom) crossing an pan tawh a ni.

Nimin khan Gaza hmarlamah Israel chuan thlawhtheihna hmangin ei tur a thlak bawk. United Arab Emirates (UAE) leh Jordan pawhin ei tur hi an thlak ve dawn tih an sawi a, UK prime minister Keir Starmer chuan thlawhtheihna hmanga ei tur an thlak ve theih nan an tih theih ang ang an ngaihtuah dawn tih a sawi.

Hetih lai hian International Rescue Committee chuan thlawhtheihna hmang chuan mipuite mamawh phuhrukna tur thlak theih a ni dawn lo tih a sawi thung.