Greece-in ram kang ṭhelh turin EU puihna a ngen

Greece ram chuan an rama hmun hrang hranga ram kang ṭhelhnaa pui turin European Union a ngen. EU pawhin an ngenna hi a pawmsak tawh bawk.

Inrinni zing lam Greece khawpui, Athens hmarlama Kyroneri khaw bulah ram a kang thar leh a, kangṭhelhtu 145 tirh nghal niin, zan thlengin water tanker leh aircraft 17 hmangin ṭhelh mah se an la ṭhelh mit thei lo. Hemi ni vek hian Aegean thliarkar, Messinia prefecture, Evia thliarkar,leh Molaous district-ahte ram a kang bawk. Khua a ro bakah thli a tleh tel bawk avangin kangmei hi a darh chak hle a ni.

Kar liam ta Thawhṭanni aṭang khan Greece ram hian khaw lum lutuk a tawng mek a, vawiin thlengin khaw lum hi a la ziaawm dawn lo nia sawi a ni. Kar tawp lam khan khaw lum lam hi 45 degree Celsius a kai a ni. Thuneitute chuan khaw lum leh ro avangin bial eng emaw zatah ram kang a thleng mai thei tih sawiin, Caterogy 5 alert a ti chhuak tawh bawk a ni.