America-a serial killer hlauhawm ber a thi

US-a serial killer hlauhawm ber tia sawi ṭhin, Samuel Little chu kum 80 mi niin Nilaini khan California hospital-ah a thi tih California Department of Corrections and Rehabilitation chuan a puang. 

Samuel hi hmeichhe pathum thah thubuaiah dam chhung tang tura hrem a ni. A thih hma hian kum 1970-2005 inkar khan hmeichhia 93 a that tih a inpuang hman. Heng a mi thah zinga a tam zawk hi sex worker leh drugs addict leh mihang hmeichhiate an ni. 

Competitive boxer hlui, Little hian tualthah nan hian chem leh silai tih vel a hmang ngai lo a, a mi thahte hi na taka hnekin, a rekhlum zui ṭhin a ni. A mi thah zinga tam tak erawh overdose emaw, accident emaw avanga thi nia ngaih an nih avangin an thih dan chhui zui tak lohte an awm. Ruang eng emaw zat chu hmuhchhuah an ni lo bawk niin official-te chuan an sawi. 

Kum 2012 khan ruihhlo kaihhnawih thilah Little hi Kentucky-ah man a ni a, California-ah thawn a ni. Hetah hian a DNA test sak niin, kum 1987-1989 inkara Los Angeles County-a hmeichhe pathum thah thubuai, chinfel loha awmte nen chhui zâwn nghal a ni. Heng thubuai pathumah hian  kum 2014 khan thiam loh chantir niin, dam chhung tang tura hremna pek ṭheuh a ni. 

Thiam loh chantir a nih hnuah kum 2018 aṭang khan a hmeichhe thah ṭhin dan hi a puang ṭan a ni. Mahse a thah zinga a zahve dawnte chungchang erawh chhui zui hleih theih lohin an awm tawh.