US-ah Covid-19 chi dang kai hmuchhuak

US-a Colorado state-ah mi pakhat chuan UK aṭanga Covid-19 hri chi dang leng mek chu a kai tih hmuhchhuah a ni a, mahse hri kai hian tun hnaiah zin chhuahna engmah a nei lo thung.

Hemi chungchangah hian Seattle-a Fred Hutchinson Cancer Research Center-a scientist Trevor Bedford chuan November leh December thlaa UK atanga US-a rawn hawte kai chhawn a nih a rin thu a sawi.

US hi khawvela Covid-19 hri kai leh thihpui tamna ber ram a la ni chhunzawm zel. John Hopkins University data-in a tarlan danin, hri kai hmuh chhuah tawh hi Nilaini thleng khan mi maktaduai 19.6 an tling tawh a, he hri thihpui hi mi 3,40,586 an tling tawh bawk. 

State hrang hrang zingah New York-ah Covid-19 vanga thi tam berin mi 37,687 in an thihpui tawh. Texas-ah 27,298 thi tawhin, California leh Florida-ah hripui vanga thi hi 21,000 chuang an awm ve ve tawh bawk a ni.