UK-in EU single market chhuahsan ta

United Kingdom chuan December 31, 2020  zanlai aṭang khan Europrean Union (EU) single market leh customs union chu official-in a chhuahsan fel ta. 

EU aṭanga UK a chhuah hnuah transition period atan December 31, 2020 thleng hi ruat a ni. He hun ral hma ngei hian EU leh UK te insumdawn tawnna kawnga an thawhdunna tur inremna siam tumin hma an la a, ṭum tam tak an inbiak hnuah transition period tawp dawn hnaih tawh takah inremna hi an siam hman hram a ni. 

Post-Brexit trade deal siam hi EU member ramten an pawm hnuah, Nilaini khan Britain Parliament-ah sawihoa vote lak niin an pawm ve leh bawk. 

He trade deal hi nimin, January 1 aṭang khan hman ṭan nghal a ni. Trade deal thar siam hian a hmaa insumdawn tawnnaa Britain rama EU rules hman ṭhin chu a thlak nghal. 

Trade and Cooperation Agreement an siam tak hmangin UK leh EU inkara insumdawn tawnna hi kalpui a ni tawh dawn a ni. Hei bakah hian British mite leh European mite khawsak dan, hnathawh leh intlawhtawn dan turah pawh visa dan thar hman a ni tawh dawn avangin a danglam chho tawh dawn bawk. Border system thar pawh hman nghal theih a ni dawn tih official-te chuan an sawi.

Britain prime minister Boris Johnson chuan UK chuan a kutah zalenna a nei ta tih sawiin, hun rei tak an lo buaipui, EU chhuahsanna tura buaipui ngaite a zawh fel tak avangin an duh dan leh ṭha zawkin hma pawh an la thei tawh dawn tih a sawi.