Thlakhat chhung chiah US hun ka pe ang : Philippines president

US-in Philippines Police General hlui leh Senator nilai Ronald Dela Rosa visa a tih tawpsak avangin Philippines chu a lungawi lo hle a, Philippine president Rodrigo Duterte chuan visa pe leh turin thla khat chhung chiah US hun a pe dawn tih a sawi. 

Nikum December thla khan US chuan Dela Rosa hi an ramah zin thei lo turin a visa a tih tawpsak a, hemi vang hian president Duterte chu a thinrim hle a, thlakhat chhunga Dela Rosa visa an tihnun sak leh loh chuan kum 1998-a US nena 'Visiting Forces Agreement (VFA)' an ziah aṭanga inhnuhdawhah a vau a ni. Dela Rosa chuan an rama police hotulu a nih laia misual tam tak that tua puh a nih vangin a visa hi an tihtawpsak a nih a rin thu a sawi ve bawk.

Kum 2016-a khan Philippines president atana Duterte hi thlan tlin a nih khan an ram chu ruihhlo hmunpuiah a chang tawh nia sawiin, ruihhlo do beihpui thlak a nih tur thu thlantlin a nih kum vek khan a puang nghal a, an ramah nasa takin 'anti-narcotics campaign' a nei nghal a ni. 

President chuan mipuite hnenah ruihhlo nghawlvei leh zuarte chu that tura tiin, hetiang mi thattute hnenah hian lawmman pe turin police-te pawh a ngen tur thu a sawi. Beihpui an thlak hnu hian ruihhlo zuar leh ngawlvei nia puh, mi 6,600 vel zet thah an ni tawh niin police-te chuan an sawi a, heng thite hi police officer-te kahhlum nia sawi ni mah se, police lam chuan mahni inven nana an thah thu an tarlang thung.  Activist-te chuan thi zat hi 27,000 an tling tawh niin an sawi. Ram hrang hrang leh human rights group-te chuan Philippines sorkar hmalak dan hi nasa takin an sawisel a, UN leh International Criminal Court pawhin an lo chhui chiang tawh bawk. Hetih lai hian Phili­ppines mipuite chuan president Duterte leh ruihhlo do beihpui a thlak dan hi an thlawp ṭha hle thung a ni.