Malaysia-ah Thailand leh Cambodia hruaitute inbia

Thailand leh Cambodia chuan ramria ram inchuha an inbeihnaah inkahhai puan a nih theih dan ngaihtuahin nimin khan Malaysia khawpui,Kuala Lumpur-ah inbiakna an nei ṭan. Meeting-ah hian Malaysia-a US leh China ambassador-te pawh an tel.

Malaysia prime minister, Association of Southeast Asian Nations (ASEAN) chair dinhmun chelh mek, Anwar Ibrahim chuan a chenna inah ram pahnih hruaitu, Cambodia prime minister Hun Manet leh Thailand acting prime minister Phumtham Wechayachai te inbiakna hi a lo kaihruai a ni. Inbiaknaa telpui tur hian US chuan State Department official-te a tir bawk. US secretary of state Marco Rubio chuan ram pahnihte buaina hi a rang thei anga tih tawp an duh thu a sawi.

Kar liam ta Ningani aṭanga ram pahnihte inbeihna thlengah an ambassador-te pawh an ko haw ve ve tawh a, Thailand chuan Cambodia nena an ramri pawh a khar vek tawh bawk.

US president Donald Trump hmalaknain ram pahnihte hian inkahhai puang tura inbiakna neih hi an remti a, mahse nimin thleng khan an la inkap chhunzawm nia sawi a ni. Ni nga chhung inkap tawhin mi 33 an thi tawh a, mi sing telin an in leh lo an tlanchhiatsan tawh bawk.