China-ah ruahsur nasa avangin mi 4,000 chuang sawn chhuak

China ramah ruahsur nasa avangin hmun eng emaw zatah tuilian leh leimin a thleng a, chhiatna thleng vanga thi hi pali an awm tawh. Mi 4,000 chuang chu hmun him lamah sawn chhuah an ni tawh bawk.

Ministry of Water Resources chuan ruah sur nasa avangin an rama lui 41 chu an lian tawh a, ruah a la sur chhunzawm dawn avangin mipuite fimkhur tura chahin warning a ti chhuak.

China khawpui, Beijing suburban area, Miyung ah kawngpuite pawh tuiin a chim a, chenna in ṭhenkhat pawh a chim tawh a ni. Mi 10,000 chuangin nimin khan electricity supply pawh an nei lo tih thuneitute chuan an sawi.

Hmarlam bialah hian kum dangah pawh ruahtui a tla nasa thin a, tuilian leh leimin an tuar fo a ni. Lui hrang hrang pawh an lian tawh hle a, Luanhe lui tui chu nimin zing khan second khatah cubic meter 2,270 vel zelin a san belh a, tui lian nasa tak a thlen mai a hlauhawm tawh niin Haihe River Water Conservancy Commission chuan a tarlang.

National Development and Reform Commission chuan Hebei lui khuahna siamṭhatna tur bakah, kawngpui leh leite siamṭhatna turin USD mtd 6.98 an ruahman nghal tih an sawi.