Al-Shabab-ten Kenya-a US sipai hmun an bei

Somali hel pawl Al-Shabab-te chuan nimin zingah khan Kenya-a tuipui kama awm Lamu County-a  US sipai hmun an bei tih an sawi.

Kenya police-te chuan US marine-te airstrip chu tihchhiat a nih bakah thlawhtheihna hal a nih thu an tarlang ve bawk. US sipaite leh helte hi an inkap nasa hle niin police-te chuan an sawi a, US thlawhtheihna bakah hian lirthei halte pawh an nei tih an sawi a ni.

Hetihlai hian Kenya sipai thupuangtu chuan airstrip hi chu a him tih sawiin, sipaite hian helte hi nasa taka lo bei letin mi pali an kaphlum tih an sawi ve thung. Kenya Defense Force thupuangtu Paul Njuguna chuan Manda airstrip, US sipai 160 vel awmna bula mi chu a him tih sawiin, Somali helte hian an bitum ngei a, mahse an hlawhchham tih a sawi a ni.

Nimin khan Al-Shabab hian thuchhuah siam zuiin nimin zinga US sipai hmun beitute hi an nih ngei thu leh an "suicide infantry"-te pawh an tel tih a tarlang. "Kan sipaite'n US leh Kenya sipai eng emaw zat an thatin an hliam a, US sipai thlawhtheihna leh lirtheite pawh an tichhe bawk a ni," tiin thuchhuah an siamah chuan an tarlang.