Russia-ah magnitude 8.8-a nain lir a nghing

Russia ram khawchhak lamah nimin zing khan magnitude 8.8-a nain lir a nghing a, Pacific bial hmarlamah tuifawn nasa tak, tsunami a thlen phah. Tsunami hi US leh Japan-ah pawh a thleng tawh a ni.

Lir nghin ṭanna hi Russia Far East, Kamchatka Peninsula-a Petropavlovsk-Kamchatsky khawpui chhim chhak lam, km 119 vela hlaah a ni a, zing dar 3:17-ah nghingin afterschock vawi eng emaw zat a thleng tawh bawk a, a ṭhen chu magnitude 6.9 a na te a awm.

Russia thuneitute chuan lir nghin ṭanna aṭanga km 350 vela hla, tuipui kama Severo-Kurilsk khuaa lawng chawlh hmun pawh tsunami hian a len chhia a, building ṭhenkhat chu tuiin a chim bawk tih an sawi. Lir a nghin hnuah tuipui hnaiha awmte chu sawn chhuah an nih vangin mihring hliam leh thi an awm lo nia sawi a ni. Kamchatka-ah pawh tsunami hi meter 3-4 a sangte a tling a ni. Tsunami hi tlangkang, lirnghing leh tui hnuaia chhiatna nasa tak thlengin tuifawn na tak a siam a, tuipui kam leh a hnaihvai ahte chhiatna nasa tak a thlen ṭhin. Lirnghing nazawngin tsunami an thlen lo a, magnitude 7.0 chinin an thlen thei.

Lirnghing vang hian US khawthlang lam tuipui dung leh Japan hmar lama tuipui kama chengte chu hmun him lam insawn chhuak tura hriattir an ni. Philippines, Indonesia, Guam, Peru leh Ecuador-a Galapagos Islands ah tsunami alert hi tih chhuah a ni bawk.

Tsunami hi Hawaii, US leh Japan-a Hokkaido ahte a thleng tawh bawk a, tuifawn san lam hi meter 5 te a tling a ni. Hokkaido-a tsunami thleng hian whale pali chu tuipui kamah a len chhuak a ni. Japan thuneitute chuan tuifawn nasa zawk a la thlen theih thu an sawi.

Russia-a magnitude 8.8-a lir a nghin hnu lawkah Tibet-ah mangitude 4.3-a nain a nghing ve bawk. July 27 khan Tibet-ah hian lir a lo nghing tawh bawk a ni.