Thailand-in inkahhai puan bawhchhiaah Cambodia puh leh

Thailand chuan ramria inkahhai an puan chu Cambodia lamin an bawhchhe leh niin nimin khan a sawi a, an bei chhunzawm leh a nih chuan na taka an chhan let tur thu a sawi.

Ram pahnihte hian Thawhṭanni zanlai aṭang khan inkahhai hi an puang a, mahse inremna an siam tawh hnuah Cambodia sipaite chuan an la bei niin Thawhlehni khan Thailand chuan a puh. Nimina inremna hi bawhchhiaah a puh leh bawk a, hmun thum aṭangin an la rawn bei chhunzawm niin a tarlang. Ram pahnihte hian ni nga an inbeih hnuah inremna hi an siam a, an inbeih chhung hian mi 43 an thih bakah civil mi nuai thum chuang chu hmun him lamah an tlanchhe bawk.

Cambodia chuan Thailand puhna hi a pha thung a, inremna siam chu an zawm thu leh enfiahtur pawh koh an huam thu a sawi. Cambodia foreign ministry thupuangtu, Chum Sounry chuan, " Dik lo taka inpuhna hi kan dem hle a ni, hei hi mi dang rilru hruai kawi thei, inrintawnna tichhe thei a ni," a ti.