Khaleda Zia-i'n Bangladesh inthlanah chuh a tum

Bangladesh prime minister hlui, Bangladesh Nationalist Party (BNP) chairperson, kum 79 mi Khaleda Zia chuan an ram inthlanpui neih turah chuh a tum.

BNP vice chairman Abdul Awal Mintoo chuan an party hotu hi a hriselna dinhmun pawh a ṭha tih sawiin, December thlaah inthlan hi buatsaih a nih chuan Feni bial aṭangin chuh a tum tih a sawi.

Kum 2024 August thlaa Sheikh Hasina kaihhruai sorkar paihthlak a nih hnua chief adviser Muhammud Yunus kaihhruai sorkar lailawk chuan inthlan buatsaih tur hi a la tikhawtlai zel rih a ni. Hasina-i party Awami League chu inthlan an chuh khap a nih avangin, BNP dinhmun a ṭhat phah hle. BNP hian hnehna an chang a nih chuan Zia hi a PM leh thei dawn a ni. Zia hi a hriselna ṭhat tawk loh vangin London-ah thla li a inenkawl a, May thla khan Bangladesh-ah a kir leh a ni.