Russia-in missile leh drone in Ukraine khawpui bei

Russia chuan missile leh drone hmangin Nilaini zan khan Ukraine khawpui, Kyiv a bei a, mi paruk an thi. Thi zingah hian mipa naupang kum ruk mi a tel.

Kyiv City military administration hotu, Tymur Tkachenko chuan Russia beihna avang hian mi 52 an hliam tih a sawi a, in chhawng kua-a sang chu kah fuh niin a chim tih a sawi bawk. In chim hnuaia tangte chhan chhuah hna thawh mek a ni a, hliam leh thi zat pawh hi an la pun theih thu a sawi.

Ukraine president Volodymyr Zelenskyy chuan a official Telegram ah Russia missile-in mihring chenna building a fuh thu leh, chhan chhuah hna thawh mek a nih thu a tarlang.

Tkachenko chuan Kyiv khawpuia hmun 27 vel chu Russia hian an kap fuh tih sawiin, Solomianskyi leh Sviatoshynskyi district-ah chhiatna a thleng nasa tih a sawi.