Canada-in Palestinian state pawm a tum ve leh

Canada prime minister Mark Carney chuan Septmeber thlaa United Nations General Assembly-ah Palestinian state chu an pawm dawn tih a sawi ve leh a, G7 ram zinga Palestinian ram pawm tumtu pathumna an ni ta. A hmain France leh UK in pawm an tum thu an lo sawi tawh a ni.

PM Carney chuan Israel-in a ram luah, West Bank-a Juda-te chenna tur a siam belh zel te, Gaza Strip-a mihring dinhmun chhe zel leh October 7, 2023-a Hamas in Israel an beihte chu Canada-in foreign policy a thlak danglam chhanah a sawi. Gaza mipuite tawrhna chu a nasa tawh lutuk a, an dinhmun hian chhiat lam a la pan zel bawk a ni, a ti.

Canada hi a hma aṭangin two-state solution thlawptu a nia, mahse inbiakna neihte chuan awmzia an nei lo a ni tiin, an mit hmuh ngeia Palestinian state din tumna chu a thamral mek niin a sawi. PM Carney chuan an thutlukna an puan hma hian Palestinian Authority president Mahmoud Abbas pawh a biak thu a sawi bawk.

Israel foreign affairs ministry chuan Canada PM thu puan hi a sawisel nghal a, Gaza Strip-a inkahhai puan leh Hamas mi hren mekte chhuah an nih theihna tura hma lakna a ti chhe thei dawn a ni, a ti.

Canada-a eptu Conservative party pawhin an PM thu puan chu an thlawp lo bawk a, October 7-a firfiakte chetna rawng tak a thlen hnua Palestinian state lo pawm hi khawvel hmuhah pawh thutlukna dik lo lantirna a ni, tiin an sawi.