Indonesia President-in eptu hruaitu 2 a ngaidam

Indonesia president Prabowo Subianto chuan eptu party hruaitu pahnih, kum thum leh a chanve ve ve jail tang tura hremte chu Ningani khan a ngaidam.

President Subianto-a'n a ngaihdamte hi Indonesian Democratic Party of Struggle (PDIP) secretary general Hasto Kristiyanto leh president hlui Joko Widodo hnuaia trade minister lo ni tawh Thomas Trikasih Lembong te an ni. Kristiyanto hi election official thamna pea puhna thubuaiah kar liam ta khan thiam loh chantir a ni a, kum thum leh a chanve tang tura hrem a ni. Lembong pawh dan dik loa chini lak luhna tur permit pe chhuakah puh a nihnaa kum thum leh a chanve tang tura hrem a lo ni tawh bawk.

Law minister Supratman Andi Agtas chuan President-in eptu pawl hruaitu pahnih a ngaihdam thu hi puangin, August 17-a an ram independence lawmna tur an neih tur pual bakah, party hrang hrangte inpumkhatna ṭha siam a nih theihna turin a ngaidam tih a sawi.

Indonesia President te hian an ram independence day thlen dawnah tang ngaihdam hi an lo tih dan ṭhin a ni. Kuminah pawh President hian mi 1,100 chuang a ngaidam a ni.