US special envoy-in Gaza Strip a tlawh

Israel-a cham mek, US special envoy Steve Witkoff chuan nimin khan Gaza Strip a tlawh a, mipui hnena ei tur sem dante a enfiah tih White House press secretary Karoline Leavitt chuan a sawi.

Steve Witkoff hi Israel-a US ambassador Mike Huckabee-a'n a ṭawiawm a, Gaza tualchhung mite pawh an kawm nghal bawk a ni. Wikoff hian Israel prime minsiter Benjamin Netanyahu pawh meeting a neihpui bawk.

Gaza-a Hamas rorelna hnuaia health ministry chuan Ningani khan ei tur sem tur dawn tuma mipui pungkhawm innekbuaite chu Israel sipaiten an kap a, mi 91 an thi niin a sawi. Mahse, Israel sipaite chuan mipui thununna atan van lam hawiin silai an hmetpuak a, thi an awm hriat a ni lo tih an sawi ve thung.

Israel official-te chuan inkahhai puanna tur leh Hamas mi hrente chhuah an nih theihna tura hmalaknaa hmasawnna a awm mai lo a nih chuan tha tharin Hamas lakah beihpui an thlak leh dawn tih a sawi.

Witkoff-a'n Israel a thlen hnu hian US president Donald Trump chuan social media-ah Gaza Strip-a mipuite harsatna tawh mek ti tawp tur chuan Hamas te an inpek a, an mi hrente an chhuah a ngaih thu a sawi.

Inkahhai puan dan tur ngaihtuaha kar liam taa Doha-a Israel leh Hamas aiawhte inbiakna an neihpuiah inremna engmah an la siam thei lo. Inremna an siam theih loh chhanah Israel leh Hamas hi an inpuh tawn a ni. US-in Hamas mi hrente chhuah a, ni 60 chhung inkahhai puang tura rawtna a siamah Israel chuan chhanna a pe tawh a, mahse Hamas lamin sawi an la nei lo thung. Hamas hian October 7, 2023-a Israel an beih ṭuma an man zinga mi 50 an la kawl a, heng zinga 20 vel chauh chu an dam tawh nia hriat a ni. Hun rei tak Gaza Strip-a indona thleng vanga mipui tawrhna a nasat tawh avangin, Gaza-a chengte pawhin Hamas inremna siam turin an nawr fo a ni.