China leh Russia-in joint naval drill nei

China leh Russia chuan nimin, August 3 aṭang khan Sea of Japan-ah joint naval drill an nei a, ni thum a awh ang.

Joint naval drill, “Joint Sea-2025” hi Russia-a Vladivostok bulhnai tuipuiah neih a ni a, nunchan an zirnaah ram pahnihte hian tuihnuai aṭanga chhan chhuah hna thawh dan, tuihnuai lawng aṭanga beihna do let dan, boruak aṭanga beihna leh missile hmanga beihna laka inven te bakah, tuipuia inbeihna thlenga beih let dante an zir ho dawn a ni. China defence minister chuan ram pahnih sipaiten nunchan an zir dunnaah hian China lawnglian pali hman a ni a, heng zingah hian guided-missile destroyers Shaoxing leh Urumqi pawh an tel tih a sawi. Drill neih zawhah ram pahnihte hian Pacific-ah naval patrol an nei bawk ang.

China leh Russia hian kum eng emaw chen joint drill an lo nei tawh ṭhin a, tuipui lama nunchan zir dunna hi kum 2012 aṭang khan an ṭan. Nikum khan China khawchhak lam tuipuiah an nei a ni.

Kumina joint drill chu thawh dunna thuk leh chak zawk neihna tura tih a nih thu China Defence Ministry chuan a tarlang. Ram pahnihte hian inlaichinna ṭha tak an nei a, Russia-in Ukraine a beihna chu kum thum tling tawh mah se China hian Russia demna a la chhak chhuak lo a, an sipaite hnukdawk tur pawhin a la nawr ve lo a ni. Hei vang hian US leh Ukraine thawhpui ram tam tak chuan indonaah hian China chuan Russia a pui niin an ngai. Mahse China chuan Russia-Ukraine indona thlengah thlawp lam a nei lo tih sawiin, indona erawh ti tawp turin a ngen thung. Khawthlang ramte chuan Ukraine chu ralthuam an pek zel avangin he buaina hian a awh rei phah niin a sawi.