Boeing fighter jet worker 3,200 chuang an nuar

Boeing fighter jet siamna, Missouri leh Illinois factory-a thawk mi 3,200 chuang awmna, International Association of Machinists and Aerospace Workers District 837 (IAM) chu company-in contract siampui a tum danah lungawi loin nimin aṭang khan an nuar. Kum 30 dawn chhunga Boeing company-a thawktuten nawrh an huaihawtna hmasa ber a ni.

IAM District 837 member-te hi F-15, T-7 training jet, missiles leh munitions siamna bakah, 777X commercial jet siamnaah pawh an thawk tel bawk.

Boeing Air Dominance vice president leh general manager, Dan Gillian chuan hnathawkte contract an siampui turah hian an hlawh 20% a tihsanna tur bakah, an hnathawh hunbia harsatna awm pawh siamṭhat tum a ni, a ti. Mahse hei hi an pawm lo a ni. Thla hmasa lam khan company in contract ziahpui a tumna chu an lo hnawl tawh bawk a ni.

Gillian chuan thawktute nawrhna a thlen pawhin tiin a hmaa an lo inbuatsaih lawk thu a sawi a, nawrh huaihawitin a nghawng buai tur pawh an chinfel theih tur thu a sawi.

IAM Midwest Territory General Vice President Sam Cicinelli chuan IAM District 837 memberte chu aircraft leh an ram venghimtu, defence system siamtu an ni tiin, an thiamna phu ang leh an chhungkua ang pawh innghahna tlak contract siampui an phu a ni, a ti.