BRICS-in Covid-19 do nan US dollar mtd 15 ruahman
BRICS chuan New Development Bank kaltlangin Covid-19 do nan US dollar maktaduai 15 ruahmanna a siam.
Video conference hmangin BRICS member ram Brazil, Russia, India, China leh South Africa-te hian meeting an nei a,meeting zawhah hian Russia foreign minister Sergey Lavrov chuan Covid-19 avanga insumdawn tawnnaah leh he hri in economy-a a chhe zawnga nghawng a neih avangin, BRICS member ramte an inṭanpui tawn theih nan hri dona turin US dollar mtd 15 chu ruahman a ni tih a sawi.
BRICS member ramte gross domestic product (GDP) hi US dollar 16.6 trillion a ni a, heng ram panga a mipui chengte hi mi tluklehdingawn 3.6 an ni bawk. India external Affairs Minister S Jaishankar chuan BRICS member-te ṭan ho theihna chuan hmasawnna a thlen ngei a rin thu a sawi a, "He hri leng aṭang hian hmasawn kan ngaihna lai tur a lang chho mek a, sumdawng tenau zawk te kan ngaih pawimawh leh zual a ṭul a ni," a ti.
S Jaishankar hian India damdawite chu mihring immune system tichaktu a nih thu sawiin, BRICS member-te chu heng India damdawi te hi hmang ve turin a chah. India chuan ram 85-ah damdawi a thawn chhuak tawh tih S Jaishankar hian a sawi bawk. Russia chuan BRICS meeting hi a kaihruai a ni.