SKorea-in ramria aurinna dah a la thla ṭan

South Korea chuan North Korea nena an inkar boruak siamṭhatna kawng an zawnna pakhatah, ramri bula NKorea lam hawia aurinna an dahte chu nimin aṭang khan an la thla ṭan.

June thlaa South Korea president atana Lee Jae Myung lak luh a nih khan, a kaihhruai sorkar chuan an ṭhenawm ram nena inremna siam tuma inbiakna neih, hun rei tak tih tawp tawh chu chhunzawm tumin hma a la a ni. North Korea sawiselna thu tih chhuahna atana aurinna dahte pawh sawiselin an hmang chhunzawm lo a ni.

South Korea Defence Ministry chuan aurinna te hman chhunzawm a nih loh hnuah ramri aṭanga lak thlak a ni zui chu Korea ram pahnihte inkar siamṭhat an duhzia a taka lantirna a ni tih a sawi. Aurinna te hi khawiah nge dahṭhat an nih dawn tih leh, ram pahnih inkar buai zual leh se an hmang leh angem tih erawh an sawi lang lo.

Hetih lai hian NKorea chuan SKorea nena inbiakna neih a tum loh thu a lo sawi tawh a, SKorea-in aurinna an lak thlak chungchangah pawh sawi engmah an la nei lo a ni.

Ramria NKorea lam hawia aurinna dahah hian an ram thuneitute huat tur zawng thuchah bakah K-pop hlate chu SKorea lam hian an tichhuak ṭhin a ni. NKorea hotu, Kim Jong-un kaihhruai sorkar chuan K-pop culture leh ṭawngin an ram a chim tur vengin an khap a, K-pop chu cancer ang maia hlauhawm niin a lo sawi tawh a ni.