California-ah ram kang nasa vangin mi 3 an hliam

US-a California state laili lai ram kang chu Thawhṭanni khan thunun hleih theih lohin a kang nasa zual a, Los Padres National Forest pawh kang telin mi pathumin hliam an tuar. Chenna in tam tak dinhmun hlauhawmah an awm bawk.

California-a ram kang, Gifford Fire hian Santa Barbara leh San Luis Obispi county-ah ram mel 100 chuanga zau a kangkai tawh a ni. Nimin tlai lam thleng khan kangmei chhuak hi an la thunun thei lo tih California Department of Forestry and Fire Protection, Cal Fire chuan an tarlang.

Gifford Fire vang hian Santa Maria khawchhak lama structure 450 vel dinhmun a him lo a, kawngpui pawh khar a ni bawk. Kangmei hi kar liam ta Zirtawpnia Santa Maria leh Bakersfield inkara State Rout 166-a chhuak a ni a, hmun li ah nasa vak loin a chhuak a, mahse Thawhṭanni khan a kang nasa zual ta a ni. Kangmei chhuah chhan tak hi hriatchian a la ni lo a, chhui chian mek a ni. Kangṭhelh 1,000 chuangin ram kang hi an ṭhelh mek a ni.