US special envoy Witkoff leh Russia President Putin inhmu

US special envoy Steve Witkoff chu nimin khan Russia-ah a zin a, Russia-Ukraine indona thleng mek tihtawp a nih theih dan tur chungchang Russia president Vladimir Putin a sawipui.

US president Donald Trump chuan Russia chu Ukraine nena an indona tihtawp a nih theihna tura inremna siam turin hun a pe a, a hun pek hi Zirtawpni hian a tawp ang. Hun pek chhunga inremna a siam lo a nih chuan Russia ram hrekna siam belhah a vau a ni.

Witkoff hian nimin khan Russia president Vladimir Putin chu meeting a neihpui nghal a, mahse meeting-a an thusawite erawh Russia chuan a puangzar lo.

Ukraine nena inremna an siam theih mai loh avangin Russia lakah President Trump a lungawi tawh lo hle. A hun pek chhunga inremna an siam lo a nih chuan hrekna thar siam bakah, Russia bungrua leitu ram pawh chhiah sang tak laksakah a vau bawk. Russia erawh chuan an ramin sumdawnna a neihpui ramte US-in a vau chu dan kalh a ni, a ti thung.

Witkoff hi real estate billionaire a ni a,sorkar palai hna lama tawnhriat a nei lo chungin kumin January thla khan Trump chuan special envoy atan a ruat a ni. Ukraine leh Gaza indonaa inkahhai puan a nih theihna tura hma la tura ruat a ni zui leh bawk.