Cambodia PM-in Nobel Prize dawng turin Trump nominate

Cambodia prime minister Hun Manet chuan US president Donald Trump chu ramri chungchangah Cambodia leh Thailand inbeihna thleng a tihtawp tir theih avangin hruaitu ropui tak a ni tiin, Nobel Peace Prize dawng tura a nominate thu a sawi.

PM Manet hian Ningani zan khan Trump a nominate thu hi Facebook ah tarlangin, Nobel Committee hnenah ram pahnihte buaina titawp tura Trump a inrawlhna chu fakawm a tih thu a hrilh a, khawvela ram inchuhna thlen nasat zinga boruak ṭha lo chhuak zel tur a bengdai thei chu hlawhtlinna ropui tak a ni,a ti.

"A hun taka a inrawlh avangin buaina punlun tur a dang a, hei hian mi tam tak nunna hloh tur a veng a, remna leh muanna a awm theihna tur kawng a hawng a ni," tiin Cambodia hruaitu chuan a sawi a ni.

Cambodia leh Thailand hi ramria ram inchuha an inbeih hnuah, President Trump chuan ram pahnih hruaitute chu an inbeihna titawp turin a ngen a, July 28 khan Malaysia-ah ram aiawhte biain inkahhai puang turin inremna an siam a ni.

Pakistan chuan India nena an inkar buaina chinfelna kawnga a puih avangin June thla khan Trump chu Nobel Peace Prize dawng tura a nominate tur thu a sawi tawh a, Israel prime minister Benjamin Netanyahu pawhin thla hmasa khan Trump hi a nominate thu a lo sawi tawh bawk.