Covid hri chi dang ram 30 chuangah ṭai darh tawh

United Kingdom-a Covid-19  hri chi dang hmuh chhuah, VUI-202012/01 chu ram 30 chuanga a ṭai darh tawh.

Covid hri chi dang hmuh chhuahna  hnuhnung ber chu Vietnam a ni a, kar liam ta Inrinni khan UK aṭanga haw hmeichhia pakhatin hri hi a kai tih hmuh chhuah a ni. Hei vang hian Vietnam sorkar chuan UK aṭanga thlawhtheihna lut tur a khap lailawk nghal a, mahse an ram mi tangkhangte hawna tur erawh a ngaihtuah sak dawn tho a ni. 

UK prime minister Boris Johnson chuan an ramah hri kai an pun chak chhoh zel avangin khuahkhirhna khauh zawk  hman a ṭul dawn niin a sawi. Hemi rual hian  school-te erawh a him ṭha a, naupangte chuan zirna an chhunzawm zel a ṭul thu a sawi nghal  bawk. 

England hmun tam zawkah khuahkhirhna khauh ber, four-tier sysem chu hman a ni tawh a, mahse PM chuan hri darh chak zel venna turin he system pawh hi a la tawk lo nia a lan thu a sawi a, khuahkhirhna khauh zawk dan tur an ngaihṭuah dawn tih a sawi a ni.