London-ah dan pawna hnawl Palestine Action thlawpna lantir

Britain sorkarin July thlaa dan pawna a hnawl, Palestinian ṭantu pawl, Palestine Action thlawpna lantirin Inrinni khan London-a Parliament Square-ah mi tam tak an pungkhawm. Pungkhawm zinga mi 365 vel chu police-ten an man.

Pungkhawmte chuan Palestine Action dan pawna hnawl leh, firfiak pawla puan a ni chu an dem thu sawiin, duh zawng sawi tura zalenna an neih khuahkhirhsakna a ni, an ti. July thla tir lam aṭang khan sorkar thutlukna siam duh lohna leh, Palestinian Action thlawpna hi ram chhung hmun hrang hrangah an lo lantir tawh a ni.

Britain sorkar chuan Palestine Action activist-ten June 20-a England hmarlam, Oxfordshire-a Royal Air Force base luhchilh a, tanker aircraft pahnih an tihchhiat hnuah an pawl hi dan pawnah hnawlin, firfiak pawlah a puang a ni. Air Force base luhchilhte hian thlawhtheihna pahnih engine chu rawng sena an kah bakah, hmanrua hmangin an tichhe tel a ni. Dan pawna hnawl a nih hnuah, an pawl thlawpna lantir hi khap a ni zui bawk.

Gaza Strip-a Israel-Hamas indona a thlen hnuah Palestine Action hian Palestinian an thlawpna an lantir fo a, a hma pawhin Israel defence contractor-te bakah Britain-a Israel sipai nena inzawmna neia an hriat hmunte an lo bei tawh bawk a ni. Sorkarin firfiak pawla a puang chu a ti mah mah tiin, an pawl thlawptute chu sorkar thutlukna siam hi court-ah a khing bawk a ni.

Prime minister Keir Starmer-a'n kumin kumtawp lamah Palestinian state pawm an tum thu sawi tawh mah se Palestinian thlawptu tam tak chuan Gaza indona titawp turin sorkar chuan hma a la tawk lo niin an sawisel.