Australia-in Palestinian state pawm dawn

Australia prime minister Anthony Albanese chuan September thlaa United Nations General Assembly neih hunah Palestinian state an pawm dawn tih a sawi ve leh. Hemi hma hian UK, France leh Canada chuan Palestinian state an pawm tur thu hi an lo sawi tawh a ni.

PM Albanese chuan Palestinian Authority aṭangin hmun ṭhenkhata sipai an dahte lak chhuah a, inthlanpui buatsaih leh Israel ram pawm tura intiamna an hmuh thu a sawi. "Middle East-a buaina leh tharum thawhna thleng reng tihtawp theihna tur beiseina ṭha ber, Gaza-a inbeihna leh tawrhna thleng tihtawp theihna tur chu ram pahnih pawm hi a ni," a ti. PA president Mahmoud Abbas chuan Palestinian state dinah chuan Hamas lamin eng chanvo mah an chang dawn lo tih a tiam hnuah thutlukna hi an siam niin a sawi.

Hetih lai hian Israel chuan Palestinian state pawm hi firfiaka chetna thlentute lawmman pekna tiin a lo sawi tawh thung. US pawhin Palestinian state pawm hi a thlawp lo a, Hamas hnena chawimawina pekna a ni, a ti. US vice president JD Vance chuan US-in Palestinian state pawm tumna a neih loh thu a sawi a ni.

Israel prime minister Benjamin Netanyahu chuan Europe ram ṭhenkhat leh Australia-te chu an rilru hruai boin a awm a ni tiin, an thutlukna siam chu a tilawm loin a zahthlak hle bawk tih a sawi. "Melbourne emaw, Sydney bulah emaw khatiang inbeihna rapthlak tak kha thleng se, kan tih ang bawk hian in ti ve ngei ang," tiin Autralia thutlukna siam chu a chhang.

Nikum khan Spain, Ireland leh Norway chuan Hamas leh Israel inkara inkahhai puan a nih theihna tura puitu a nih beiseiin Palestinian state hi an lo pawm tawh bawk. UN member ram 193 zinga ram 147 in an pawm tawh a ni.