Nepal-in an rama tlang 97 a thlawna lawn phal

Nepal sorkar chuan an rama mountain tourism chawilar a, tlang lawn mi tam zawk hip luh an nih theihna turin an ram khawthlang lama tlang 97 te chu man chawi ngai loa lawn a phal.

Sorkarin thupek tihchhuah tharah Karnali leh Sudurpashchim province-a tlang 97 te hi kum hnih chhung a thlawnin a lawn theih dawn a ni. Heng tlangte hi meter 5,870 - 7,132 inkara sang an ni.

Tourism department director Himal Guatam chuan he ruahmanna thar hmang hian an ram khawthlang lam, tlawhpawh nasat lohte chu tlawhtu an pun ngei an rin thu a sawi a, tualchhung mite tan ei zawnna a siamsak nghal dawn a ni, a ti.

Nepal sorkar chuan Mt Everest lawn tumte tan, a hmain tlang meter 7,000 a sang pakhat tal lawnchhuak phawt turin rawtna a siam bawk. Tourism Act siamṭhatna hi telh a ni a, Upper House-a ngaihtuah tura thawn a ni.

Kumin kumtir lam khan Nepal sorkar chuan khawvela tlang sang ber, meter 8,848.86-a sang lawn turte tan fee, mi pakhatah USD 11,000 lak ṭhin chu USD 15,000 ah a tisang a ni. He rate thar hi September 1, 2025 aṭangin hman ṭan a ni ang.