South Korea first lady hlui man a ni

South Korea president hlui, Yoon Suk Yeol-a nupui, Kim Keon Hee chu thamna la leh stock tichingpena puhna thubuaiah Thawhlehnia court-a a inlan hnuah man a ni.

First lady hlui, Kim puhna hi court-ah darkar li vel ngaihtuah a ni a, an puhnate chu thu dik lo vek niin a sawi thung. Mahse, court chuan puh a nihna finfiahnate a tihchhiat venthawn thilah manna tur thupek tichhuakin, an hreng zui nghal a ni. Yoon leh Kim te hi South Korea president hlui leh president hlui nupui man hmasak ber a ni.

Prosecutor-te chuan kum 52 mi, Kim hian SKorea-a BMW dealer, Deutsch Motors stock tihchingpennaah inrawlhin, won mtd 800 (USD 577,940) a neih phah niin an sawi. Hei hi a pasal president atana thlan tlin a nih hma a ni thung. Thamna leh thilpek man tam tak dawngah puh a nih bakah, kum 2022-a parliament by-election neih leh nikuma inthlanpui an neihah candidate siamnaah pawh a inrawlh niin an puh bawk.

Yoon a president laiin eptuten a nupui Kim chungchang chhui chian phutna bill pathum an put luh chu a thuneihna hmangin a lo dang a ni. A hnuhnung ber chu nikum November thlaah khan niin, martial law a puan hma lawkah a ni. President aṭanga paihthlak a nih hnuah amah thlaktu, Lee Jae Myung kaihhruai sorkar chuan kumin June thla khan Kim an puhna chhuitu tur special counsel hi a din ta a ni.

Kim hi Seoul Nambu Detention Centre-ah dah a ni a, he hmun hi kum 2011-a hawn niin hmeichhe warden-ten an enkawl a ni. First lady hlui ni mah se duhsak bik a ni dawn lo a, tang dang ang bawkin enkawl a ni dawn tih an sawi. A cell-ah dawhkan te pakhat leh a mutna tur awngphah dah a ni. Pathianni tih lohah chuan nitin cell pawn lamah darkar khat a chhuah phalsak ṭhin a ni bawk ang.