NKorea-in ramria aurinna dah lak thlak a ni lo tih sawi

South Korea-in an ṭhenawm, North Korea ramria aurinna an dah an la thla nia an sawi chu NKorea chuan a dik lo niin an sawi ve thung.

Ramriah hian NKorea lam hawiin SKorea hian aurinna hi a dah a, North Korea sawiselnate an tih chhuah bakah, kpop music te an ti ri ṭhin bawk a ni. A chang chuang zanlaiahte tihrik ṭhin a ni a, hei vang hian ramri bula cheng, SKorea lam mite pawhin thawm bengchheng hi an sawisel fo a ni. NKorea chuan aurinna dah hi indona peng pakhat angah a ngai a, bomb chiatah a lo vau fo tawh bawk.

Aurinna an dah hi kum ruk vel tihrik a nih tawh loh hnuah, kumina president a nihna aṭanga paihthlak tak, Yoon Suk Yeol-a president-na hnuaiah kum 2024 aṭangin tihrik a ni leh a ni. Hei hi NKorea-in bawlhhlawh dahkhawmna balloon SKorea lama a chhuah ṭhin avanga chhan letna atana an tih a ni.

Kumin June thlaa SKorea president atana Lee Jae Kyung lak luh a nih hnuah NKorea nena an inkar boruak siam ṭhat a, inbiakna neih chhunzawm tura hma lain, ramria aurinna dahte hman chhunzawm a ni lo. Tun thla tir lam aṭang aurinnate hi an la thla ṭan tih an sawi. SKorea sipaite chuan aurinna dah ṭhenkhat an lak thlak hnuah, NKorea pawhin an la ṭhen ve tawh niin a sawi.

Mahse, NKorea hotu Kim Jong-un-a farnu, Kim Yo Jong chuan SKorea-in ramria aurinna an la thla nia an sawi chu a dik lo a, an la thla lo a, lak thlak tumna pawh an nei lo tia sawi thu state media KCNA chuan nimin khan a talrang. Kim chuan SKorea nena an inlaichinna siamṭhat an tum lo tih vawi tam tak an lo sawi tawh thu a tarlang bawk.