Nile dam chungchangah Egypt, Sudan leh Ethiopia te inbiak AN tum

Egypt, Sudan leh Ethiopia-a ministers of foreign affairs and irrigation-te chuan Pathianni khan inremna an siam a, he inremnaah hian Ethiopia rama tuikhuah "Grand Ethiopian Renaissance Dam (GERD)" chungchanga inbiakna neih an rel a ni.

Pathianni khan virtual hmang­in ram pathum minister-te hi an inhmu khawm a, he hunah hian hun rei tak aṭanga GERD chung changa an inhmuhthiam lohna awm tawh chu siam ṭhat a nih theih nan inbiakna neih leh hi an rel thlu ta a ni. GERD chungchanga inrem lohna awm chu nikum khan chinfel tum a lo ni tawh bawk a ni.

Ethiopia rama tuikhuah siam mek hian Nile lui a pawhpen dawn vangin GERD chungchangah hian ram pathumte hi an inrem thei lo a, Egypt lam chuan nasa taka sawiselin, tui lamah harsatna an neih an rin avangin he tuikhuah siam hi an duh lo hle. 

GERD hi kum 6 chhunga zawh an duh a, kum 2011 aṭang khan an khuap ṭan a, kum 2017 August thla khan zaa 60 an zo tawh a ni. Bul tan a nih aṭang khan Egypt leh Sudan chuan an sawisel nghal a, hei vang hian hna hi zawhfel lohin a awm a ni.

Grand Ethiopian Renaissance tuikhuah hian megawatt (MW) 6,000 a pechhuak thei dawn a, he tuikhuah siamna atan hian US dollar tluklehdingawn 5 ruahman a ni. Siam zawh theih a nih chuan Africa rama tuikhuah lian ber tur a ni dawn a, khawvela tuikhuah lian ber pasarihna a ni bawk ang.