Spain-ah ram kang a zual zel

Spain ramah ram kang a la zual zel a, Pathianni khan hmun 20-ah ram nasa takin a la kang a, kang ṭhelh pui turin military emergency unit aṭangin sipai 500 tirh belh an ni. Kangṭhelh pawl pui tur hian sipai 1,400 tirh an lo ni tawh bawk.

Hmar lama Galicia bialah ram kang hi a nasat avangin kawngpui khar a ni a, rel service pawh tihtawp rih a ni bawk. Hmun 12-ah ram hi a la kang a, kangmei chhuahna hi Ourense khawpui hnaivaiah vek an ni tih regional government hotu, Alfonso Rueda chuan a sawi. Mi tam tak hmun him lamah sawn chhuah an ni tawh. Meikhu a nasat avangin mipuite chu pawn an chhuah pawhin face mask hmang vek turin an ti a, pawn lama hun hmang tam lo turin an ngen bawk.

Spain ram hmun ṭhenkhatah khaw lum lam hi Pathianni khan 45 celsius te a tling a, khaw lum bakah khua a ro bawk avangin kangmei hi a kangkai chak hle a ni. Kuminah ram hectare 158,000 vela zau a kang tawh a ni. Kar liam ta khan kangmei chhuak vang hian mi pathum an thi a ni.

Prime minister Pedro Sanchez chuan Pathianni khan ram kang tuar nasa zinga mi, Ourense khua a tlawh a, kangmei ṭhelh mih thuai a nih theihna turin sorkar chuan theihtawp a chhuah zel dawn tih a sawi.

Ram kang ṭhelh pui tur hian France leh Italy aṭangin thlawhtheihna pahnih an tir dawn a ni. Anni bakah Europe ram dangte pawhin kangṭhelhtute tirh an tum bawk. Europe chhim lam ramte chuan khaw lum leh ro an tuar mek a, Spain bakah ram dang pawhin ram kang hi an tuar a, Portugal-ah chuan kuminah ram square km 1,550-a zau a kang tawh. Greece, Bulgaria, Montenegro leh Albania ram pawhin ram kang vangin European Union puihna an lo dil tawh bawk a ni.